Дафтари матбуоти Додгоҳ рӯзи 19-уми август хабар дод, ки Лутфуллои Назирмад, Ҷумъахон Қурбонов, Ёқубҷон Юсуфзода ва Муҳаммад Шарифзода то 22-юми ноябри имсол дар Боздоштгоҳ мемонанд.

Мурофиа паси дарҳои баста гузашт. Тафсилоташ, аз ҷумла мавқеи гумонзадҳо маълум нест.

Аз ин пеш, рӯзи 16-уми август, Додгоҳи ноҳияи Басманний бо дархости Кумитаи тафтишоти Русия муҳлати ҳабси Муҳаммадсобир Файзов, Далерҷон Мирзоев, Муродалӣ Раҷабализода ва Шамсидини Фаридунро ҳам то 22-юми ноябр дароз кард.

Ин афрод аз моҳи марти имсол дар ҳабс ҳастанд.

Ҳамла ба "Крокус Сити Ҳолл" дар наздикии Маскав дар шаби 22-юми марти имсол сурат гирифт. Мақомоти Русия гуфтанд, дар ин ҳодиса 144 нафар ҷон бохта, беш аз 500 кас осеб диданд.

Гурӯҳи тундрави "Давлати исломӣ" ё ДОИШ масъулияти ҳамларо ба дӯш гирифт, вале баъзе аз мансабдорони Русия ангушти иттиҳомро ба тарафи Украина дароз карданд. Киев даст доштанашро дар ҳодиса инкор кард.

Додгоҳи ноҳияи Басманнийи шаҳри Маскав то кунун беш аз даҳ нафар, аз ҷумла шаҳрвандон ва зодагони Тоҷикистонро ба гумони даст доштан дар ҳамла ба “Крокус Сити” ба ҳабс гирифт. Шиканҷаи ошкори боздоштшудаҳо таҳқиқи мунсифонаи қазияро зери суол бурдааст.

Чанд шаҳрванди боздоштшудаи Тоҷикистон ба зидди қарори додгоҳ шикоят карда, худро расман бегуноҳ донистанд. Додгоҳ дархости онҳоро барои бозбинии парванда напазируфт

Муҳоҷирони тоҷик мегӯянд, пас аз ҳамла санҷишу боздошт ва ихроҷ афзуда, муносибати мардуму корфармоён бо онҳо дар Русия тағйир ёфтааст.

Шаҳрвандони боздоштшудаи Тоҷикистон, ки муҳлати ҳабсашон то моҳи ноябр дароз шуд:

МУҲАММАДСОБИР ФАЙЗОВ

Муҳаммадсобир Файзови 19-соларо рӯзи 23-юми марти имсол дар Русия дастгир карда, бо аробаи маъюбӣ ва либоси тиббӣ ба Додгоҳи ноҳияи Басманний оварданд. Пеш аз он дар шуъбаи эҳё буд ва бозпурсияш дар он ҷо гузашт. Ҳангоми амалиёти боздошт як чашмаш осеб дидааст.

Сайрам Файзова, модари Муҳаммадсобир Файзов, моҳи марти имсол ба Радиои Озодӣ гуфт, ҳеч бовараш намеояд, ки фарзандаш ҳамлаи террористӣ анҷом додааст. "Писарам шахси мазҳабӣ набуд, намозро ҳам соз намехонд, қазо мекард," -- нақл карда буд ӯ.

Дар аксу наворҳояш дар шабакаи иҷтимоии "ВКонтакте"-и русӣ Муҳаммадсобир Файзов гоҳе бо риш ва дар бархе маврид бидуни риш ҷавони шод ва коргари хуб тасвир ёфтааст. Аз миёни аксу наворҳои гузоштаи ӯ саҳнаҳое аз кораш бо муштариҳои рус, маҳалли кор, мошинсаворӣ ва наворҳои кӯтоҳ бо мусиқӣ низ дида мешаванд. Баъзе аз расонаҳои Русия нигоштанд, ки ӯ ба варзиш ҳам рағбат дошт ва дар толори варзишии War Pro дар Иваново дар дарсҳои кикбоксинг ширкат кардааст.

ДАЛЕРҶОН МИРЗОЕВ

Далерҷон Мирзоеви 32-сола аз деҳаи Галахонаи ноҳияи Рӯдакӣ рӯзи 23-юми марти имсол дар Брянск боздошт шуд. Дар наворе дар шабакаҳои иҷтимоӣ, ки иддао мешавад лаҳзаи боздошти Мирзоев аст, ӯро аз болои як дарахт ба поин фароварда, сипас ба дастонаш завлона мезананд.

Ба нақли наздиконаш, ӯ шаш моҳ пеш аз ҳодиса ба Русия рафта, дар хонаи амакбачааш дар Новосибирск мезист ва таксӣ меронд. Дар Тоҷикистон низ ба таксиронӣ машғул будааст.

Модараш, Гулракат Мирзоева, гуфта буд, ки бовар надорад, ӯ дар ҳодисаи террористӣ даст дошта бошад.

САИДАКРАМ РАҶАБАЛИЗОДА

Мақомоти Русия Саидакрам Раҷабализодаро рӯзи 23-юми март дастгир карда, дар аввал барои ду моҳ (то 22-юми май) ба ҳабс гирифта буданд. Ҳамсараш Бибисоро Ашӯрова ба Радиои Озодӣ гуфт, ӯ дар аввали моҳи январи имсол барои кор ба Русия рафт, аммо "тақрибан се моҳ на занг зад, на суроғ кард ва на пул фиристод".

Манобеи амниятии Туркия ба нашрияи “Ҳуррият”-и ин кишвар гуфта буданд, ки Саидакрам Раҷабализода 5-уми январи имсол вориди Истанбул шуда, 2-юми март якҷо бо Фаридуни Шамсиддин, гумонбари дигари ҳамла ба "Крокус", ба Русия рафт.

Саидакрам Раҷабализода то замони ба Русия рафтан дар корхонаи мебелсозӣ дар шаҳри Ваҳдат кор мекард. Ҳамсараш мегӯяд, "ӯ кӯшиш дошт як мошини “Опел” харида, дар ҳамин ҷо монад ва ба кораш идома диҳад.”

Ҳамдеҳагон ва ҳам наздиконаш гуфтанд, Раҷабализода намоз мехонд, аммо дар ягон ҷо таълими динӣ нагирифта буд. Бибисоро Ашӯрова мегӯяд, “мактаби миёнаро то синфи 9-ум хондааст. Дигар дар ягонҷо таҳсил накарда набуд. Гоҳ намоз мехонд, гоҳ намехонд.”

ФАРИДУНИ ШАМСИДДИН

Мақомоти Русия мегӯянд, номи Фаридуни Шамсиддини 25-сола дар "рӯйхати террористон ва ифротгароён" дар ин кишвар сабт шудааст. Аз шаҳри Ҳисор аст. Рӯзи 23-юми март дастгир карданд.

Дар навори бозпурсии мақомоти Русия Фаридуни Шамсиддин дар ҳоле ки дастонаш баста ва дар замин ба зону зада буд, гуфт, барои иҷрои ҳамлаи террористӣ аз ёвари як рӯҳонӣ “500 ҳазор рубл” гирифт. Баъзе аз корбарони шабакаҳои иҷтимоӣ ва коршиносон ба дурустии он шубҳа карданд.

Шабакаҳои русӣ дар Телеграм рӯзи 23-юми март акси шиканҷа шудани ӯро бо барқ нашр карданд. Бахши русии Радиои Озодӣ дар як таҳқиқот бо такя ба саҳифаҳои Фаридуни Шамсиддин дар шабакаҳои маҷозӣ маълум кардааст, ки ӯ чанд аксе аз ҳузураш дар Истанбули Туркия нашр карда ва номашро дар бархе шабакаҳои маҷозӣ Абдулло гузоштааст.

Фаридуни Шамсиддини дар соли 2014, замони таҳсил дар синфи 7-уми як мактаби миёнаи Ҳисор бо гумони озори ҷинсии ноболиғи 6-сола боздошт ва шаш сол зиндонӣ шудааст. Соли 2020 аз зиндон раҳо ва пас аз ду сол оиладор шуд. Ҳоло як тифли даҳмоҳа дорад. То рафтан ба Русия дар шаҳри Ҳисор дар нонвойхонае кор мекардааст.

Хешовандони Фаридуни Шамсиддин дар деҳаи Лойоба мегӯянд, пас аз раҳо шудани аз зиндон дар рафтору кирдори ӯ амалкардҳои ғайриинтизореро мушоҳида накарда буданд.

ЛУТФУЛЛОИ НАЗРИМАД

Мақомоти тафтишотии Русия алайҳи ин шаҳрванди Тоҷикистон бар асоси моддаи "анҷоми амали террористӣ дар ҳайати гурӯҳи созмонёфта, ки боиси марги инсон шудааст" парванда боз кардаанд.

Баъзе аз расонаҳои Русия қаблан навишта буданд, ки ӯ як рӯз баъди ҳамла дар "Крокус Сити Ҳолл"-и Маскав барои дағалӣ бо полис боздошт ва дертар гуё рабт доштанаш ба ҳодиса собит шудааст. Азбаски он замон мурофиа паси дарҳои баста гузашта буд, мавқеи худаш маълум набуд. Дар зодгоҳаш ба дурустии он шубҳа доранд.

Хабарнигорони Радиои Озодӣ барои суҳбат бо наздикони Лутфуллои Назримад ба ноҳияи Панҷ рафтанд, аммо онҳоро наёфтанд. Ҳамсояҳои ин ҷавон гуфтанд, ӯ мактабро бо баҳои аъло хатм кардааст ва ба иттиҳоми эълоншуда нисбат ба ӯ дар Русия бовар надоранд. Вай тобистони соли гузашта Донишгоҳи шаҳри Бохтарро хатм карда, барои ҷустуҷӯйи кор ба Русия рафтааст.

Лутфуллои Назримад фарзанди калонии Назримад Ҳаётов, корманди идоари фарҳанги ноҳияи Панҷи вилояти Хатлон, будааст. Ба гуфтаи наздиконаш, падари хонадон ӯро барои кор ба Русия фиристода буд, то бо мадади писараш соҳиби манзил шаванд.

ҶУМЪАХОН ҚУРБОНОВ

Ҷумъахон Қурбонови 21-сола рӯзи 27-уми апрел бо қарори додгоҳи Басманнии шаҳри Маскав ва ба гумони “маблағгузорӣ барои омодагӣ ба ҳамлаи террористӣ” ба ҳабс гирифта шуд.

Манзили волидони Ҷумъахон Қурбонов дар ҷамоати Хуросони ноҳияи Фархори вилояти Хатлон ҷойгир аст. Модараш омӯзгор аст, падараш деҳқонӣ мекунад. "Бо саводи худаш ба Донишгоҳи омӯзгорӣ дар Душанбе дохил шуда буд. Зӯрамон нарасид, ки пули иҷора ва харҷҳои дигарашро диҳем. Ночор барои пулкоркунӣ ба Русия рафт," – нақл кард Бегиёр Саидов, падари Ҷумъахон, рӯзи 6-уми май ба Радиои Озодӣ.

Ӯ афзуд, Ҷумъахон ҳамроҳи бародараш, Сӯҳроб Қурбонов, дар як макон дар пойтахти Русия зиндагӣ ва дар сохтмон кор мекарданд. Ҳар моҳ барои харҷи оила то 20 ҳазор рубли русӣ ё зиёда аз дусад доллари амрикоӣ мефиристодааст. "Ман ба бегуноҳии фарзандам бовар дорам," -- гуфт Саидов ва афзуд, “ба иттиҳоми эълонкардаи мақомот дар Русия бовар надорем. Пайваста насиҳаташ мекардам, ки танҳо ба роҳи рост рав.”

ЁҚУБҶОН ЮСУФЗОДА

Кумитаи тафтишотии Русия Ёқубҷон Юсуфзодаро ба он муттаҳам кард, ки чанд рӯз пеш аз ҳамла барои таъмини гумонбарон бо ҷой "тавассути корти бонкӣ ба як шарикаш пул фиристодааст".

Муфаттишон гуфтаанд, як қисми пул "баъд аз содир шудани ҷиноят ба ҳисоби яке аз ҳамлаварон гузаронда шуд." Тасдиқи он аз манобеи дигар имконпазир нест. Назари худаш ё наздикону вакили мудофеъ ва ҷузъиёти парванда дастрас нест.

Саҳифаи "Маш" дар Телеграм нигоштааст, ки Ёқубҷон Юсуфзода ҳангоми амалиёти “Нелегал” ва тасодуфан рӯзи 26-уми март дастгир шуда, сипас робитааш бо ҳамлаварон ошкор гаштааст.

Ба иттилои дарёфтии Радиои Озодӣ, Ёқубҷон Юсуфзода 25 сол дорад, оиладор ва соҳиби се фарзанд. Ҳангоми боздошт дар сохтмон кор мекардааст.

МУҲАММАД ШАРИФЗОДА

Додгоҳи ноҳияи Басманнии шаҳри Маскав рӯзи 5-уми апрел дастури ҳабси Муҳаммад Шарифзодаро содир кард. Ӯ ба "амали террористӣ" муттаҳам аст, вале ба сабаби пӯшида будани мурофиа назари ӯ ё вакили мудофеаш дастрас нест.

Артиши Исроил гуфт, гузоришҳо дар бораи кушта шудани 9 кӯдак дар шаҳри Хон-Юнисро таҳқиқ мекунад.

Ба гуфтаи намояндагони гуруҳи "Ҳамос", рӯзи 24-уми май дар ҳамлаи ҳавоии артиши Исроил ба ҷануби Навори Ғазза, 9 кӯдак кушта шудааст. Гуруҳи "Ҳамос" дар Амрико ва Иттиҳоди Аврупо созмони террористӣ шинохта шудааст.

Ба гузориши Оҷонсии авиатсияи шаҳрвандии Ғазза, ки зери назорати “Ҳамос” кор мекунад, кӯдакони кушташуда аъзоёни як оила буданд. Падари ин хонавода Ҳамдӣ ал-Наҷор ва ҳамсараш пизишк будаанд.

Маҳмуд Бассол, як намояндаи Оҷонсии авиатсияи шаҳрвандии Ғазза гуфтааст, ҷасади кӯдакон аз зери харобаҳо пайдо шуд. Чанд нафари онҳо сӯхтаанд. Падари хонавода ва як кӯдаки даҳсолааш бо захмҳои вазнин зинда мондаанд. Онҳоро ба беморхонаи “Носир” интиқол додаанд.

Артиши Исроил ҳамла ба Хон Юнисро расман тасдиқ карда гуфт, мушак аз як ҳавопаймои бесарнишин "ба чанд гумонбар дар як бино бархӯрд.” Дар ин маҳалла неруҳои исроилӣ мустақар будаанд. Низомиёни Исроил мегӯянд, Хон-Юнис "минтақаи ҷангии хатарнок" аст ва маълумот дар бораи талафоти эҳтимолии ғайринизомиён "тафтиш карда мешавад".

Иттиҳоди Аврупо ният дорад, ки зиёда аз 20 бонки Русияро аз низоми байнулмилалии SWIFT берун кунад. Дар ин бора Оҷонсии Bloomberg бо такя ба манобеаш хабар додааст.

Ба қавли ин манбаъ, маҳрум кардани зиёда аз 20 бонки русӣ аз низоми SWIFT, дар доираи бастаи нави таҳримҳои ИА алайҳи Маскав пешбинӣ шудааст.

Ба ҷуз ин, Иттиҳоди Аврупо эҳтимол нархи ҳар барел нафти Русияро аз 60 доллар то 45 доллар кам кунад. Бунёди хатти интиқоли гази “Ҷараёни шимол” шояд манъ шавад.

Ҳамчунин ҷорӣ кардани маҳдудиятҳои нави тиҷоратӣ ба маблағи ҳудуди 2,5 миллиард доллар дар баррасии Иттиҳоди Аврупо аст. Ҳадаф аз ин, коҳиши даромади Русия ва маҳдуд кардани дастрасии он ба фанновариҳои низомӣ аст.

Ба гузориши Bloomberg, Комиссияи Аврупо дар бораи таҳримҳои нав алайҳи Маскав, бо аъзоёни Иттиҳоди Аврупо гуфтугӯ дорад. Санаи эълони таҳримҳои нав ҳанӯз маълум нест.

SWIFT низоми байнулмилалии бонкӣ аст. Баъди таҷовузи Русия алайҳи Украина дар феврали соли 2022, Амрико ва Иттиҳоди Аврупо даҳҳо бонки русиро аз SWIFT берун карданд. Вале сарфи назар аз ин, ба гуфтаи мақомоти Русия то охири соли гузашта қариб 200 бонки русӣ ба низоми SWIFT дастрасӣ доранд.

Туркия аз тасмими Амрико ва Иттиҳоди Аврупо барои бекор кардани таҳримҳо алайҳи Сурия истиқбол кард. Ин нукта дар дидори Раҷаб Тайиб Эрдуғон, раиси ҷумҳури Туркия ва Аҳмад аш-Шаръ, раҳбари муваққатии Сурия садо дод. Ин вохӯрӣ 24-уми май дар Истанбул баргузор шуд.

Ба гузориши расонаҳои маҳаллии Туркия ва Сурия, Эрдуғон ва Аҳмад Шаръ дар бораи бозсозии Сурия ва ҳамкориҳои амниятӣ гап задаанд.

Рӯзи 23-юми май маъмурияти Доналд Трамп аз бекор шудани баъзе таҳримҳо алайҳи Сурия ва содир шудани иҷозатнома барои сармоягузорӣ дар ин кишвар хабар дод. Иттиҳоди Аврупо низ ҳафтаи гузашта бо лағви тадриҷии таҳримҳо алайҳи Димишқ мувофиқат кард.

Таҳримҳои Амрико ва Иттиҳоди Аврупо зидди режими президенти пешин Башор Асад ҷорӣ шуда буданд, ки моҳи декабри соли гузашта аз қудрат барканор гардид.

Рӯзи 25-уми май дар пайи ҳамлаи неруҳои Русия ба вилояти Житомир, воқеъ дар шимолу ғарби Украина 3 наврас ба ҳалокат расидаанд. Дар ин бора Хадамоти давлатии ҳолатҳои фавқулодаи Украина хабар додааст. Қурбониён 8, 12 ва 17 сола будаанд.

Ба гуфтаи мақомоти Украина, дар ин ҳамла 10 каси дигар маҷруҳ шудааст, ки дар беморхона бистарӣ шуданд. "Чанд хонаи сокинон ҳам хароб шуданд,"-омадааст дар хабарномаи расмӣ.

Дар ноҳияи Бердичевскийи вилояти Житомир ду кас, азҷумла як кӯдак захмӣ шудаанд. Ба гуфтаи мақомоти Украина, дар ин ҳамла як бинои панҷошёна ва чанд хонаи дигар зарар диданд.

Русия талош дорад 50 ҳазор сарбозро ба хатти ҷанг дар вилояти Харкови Украина фиристад. Дар ин бора телевизиони Sky News хабар додааст.

Ба гузориши ин расона, то фаро расидани сардиҳо Маскав ҳамагӣ чор моҳ фурсат дорад, ки хатти дифои Украинаро дар вилояти Харков шиканад.

Манобеъ дар артиши Украина гуфтаанд, фармондеҳони Русия барои як ҳамлаи калон омода мешаванд.

Мақомоти Русия гузориши Sky News-ро шарҳ надодаанд.

Пештар президенти Украина Владимир Зеленский бори дигар дигар аз ИМА ва шарикони Киев дархост кард, ки фишор ва таҳримҳо алайҳи Русияро сахтар кунанд, то Маскав ба оташбас тан диҳад. Изҳороти Зеленский дар ҳоле садо дод, ки артиши Русия шаби 24-уми май бо даҳҳо мушаки баллистикӣ ва паҳпод ба шаҳрҳои Украина ҳамла кард.

Маъмурияти президент Доналд Трамп ба ихтисори васеи кормандони Шӯрои амнияти миллии Амрико шуруъ кардаанд. Ба гузориши нашрияи Вашингтон пост, хабаргузории "Ройтерс" ва телевизиони CNN, даҳҳо кормандро аз кор ҷавоб медиҳанд.

Ба гузориши CNN, зиёда аз сад корманди Шӯрои амнияти ИМА ба рухсатии маъмурӣ фиристода шудаанд. "Ройтерс" менависад, дар миёни онҳо мутахассисон оид ба масъалаҳои байнулмилалӣ ҳам ҳастанд. Ин кормандон бегоҳи 23-юми май огоҳӣ гирифтаанд, ки корашонро аз даст медиҳанд.

Ихтисори кормандони Шӯрои амнияти Амрико баъди таъини Марко Рубио ба мақоми мушовири амнияти миллӣ таъин шуд. Рубио дар ин мақом ҷойгузини Марко Уолтс шуд, ки баъди фош шудани нақшаи ҷанг алайҳи ҳусио мақомашро тарк кард.

Тарафдорони кам кардани кормандон дар Шӯрои амнияти Амрико мегӯянд, ин ниҳод дар давраи президентони қаблӣ корманди зиёдро ҷалб кардааст. Дар даврони Ҷорҷ Буши хурдӣ дар Шӯрои амнияти ИМА 204 нафар кор мекард. Барак Обама шумораи кормандонро то 222 кас зиёд намуд ва бо омадани Ҷо Байден теъдоди кормандон то 186 кас кам шуд.

Маъмурияти Трамп ҳоло ният дорад, ки шумораи кормандони Шӯрои амнияти ИМА-ро то 50-60 кас кам кунанд.

Маъмурияти Доналд Трамп аз бекор шудани баъзе таҳримҳо алайҳи Сурия ва содир шудани иҷозатнома барои сармоягузорӣ дар ин кишвар хабар дод. Дар иттилоияи Кохи Сафед аз рӯзи 23-юми май омадааст, ин иқдом бо ҳадафи бозсозии Сурия пас аз солҳо ҷанги дохилӣ анҷом шудааст.

Ҳамзамон Кохи Сафед аз Димишқ хостааст, то ихроҷи ҷангҷӯёни хориҷиро оғоз кунад.

Вазорати хориҷаи Амрико 23-юми май бо судури як муҷаввиз эълон кард, ки додугирифти молӣ бо давлати муваққати Сурия, бонки марказӣ, бахши ҳавонавардӣ ва ширкатҳои давлатии Сурия иҷозат аст.

Рӯзи 13-уми май Доналд Трамп дар сафараш ба Арабистони Саудӣ эълон кард, ки Вашингтон таҳримҳо алайҳи Сурияро бекор мекунад. Ин таҳримҳо зидди режими президенти пешин Башор Асад ҷорӣ шуда буданд, ки моҳи декабри соли гузашта аз қудрат барканор гардид.

Қурби доллари амрикоӣ дар баробари асъори миллии сомонӣ ин ҳафта ба таври назаррас поён рафтааст. Рӯзи 24-уми май тибқи қурби расмии Бонки миллии Тоҷикистон, 100 доллар ба 1022 сомонӣ баробар аст. Аввали ин ҳафта 100 доллар 1037 сомонӣ арзиш дошт.

Дар бонкҳои тиҷоратӣ бошад қурби доллар аз ин ҳам пастар аст. Рӯзи 24-уми май дар бонкҳои тиҷоратии Тоҷикистон 100 доллар аз 1005 то 1010 сомонӣ арзиш дорад. Давоми се соли ахир қурби доллар дар баробари сомонӣ то ин ҳад паст нашуда буд.

Бонки миллии Тоҷикистон ва бонкҳои тиҷоратӣ якбора паст шудани қурби долларро шарҳ надодаанд. Вале арзиши доллар дар ҳоле дар Тоҷикистон паст мешавад, ки ахиран қурби доллар дар баробари рубли русӣ ҳам поён рафт. Тибқи қурби расмии Бонки марказии Русия, 22-юми май як доллар ба 79,34 рубл баробар аст. Ба навиштаи РБК, давоми ду соли ахир ин бори аввал аст, ки арзиши 1 доллар аз 80 рубл поён мешавад.

Поёнравии қурби доллар аз оғози моҳи апрел оғоз шуд. Баъзе иқтисодшиносон ин вазъро ба таърифаҳои ҷорикардаи маъмурияти Доналд Трамп рабт медиҳанд. Дар оғози моҳи апрел маъмурияти Доналд Трамп барои молу колои 185 кишвари ҷаҳон таърифа (тариф, тарофа) ё боҷи гумрукӣ ҷорӣ кард.

Қурби рубли русӣ, ки барои муҳоҷирони тоҷик ва наздикони онҳо муҳим аст, ин ҳафта дар Тоҷикистон бетағйир буд. Феълан ҳазор рубли русӣ дар бонкҳои тиҷоратии Тоҷикистон ба 127 сомонӣ баробар аст.

Бо вуҷуди он ки мақомоти Тоҷикистон вазъи асъори хориҷиро ба тақвияти пули миллӣ низ рабт медиҳанд, ба сурати умум бозори пули Тоҷикистон ба қурби рубли Русия, доллари Амрико ва юани Чин бастагии зиёд дорад.

Даври панҷуми музокироти ИМА ва Эрон бар сари барномаи ҳастаии Ҷумҳурии Исломӣ рӯзи 23-юми май дар шаҳри Рум баргузор шуд. Музокирот бо миёнҷигии Уммон ва дар қароргоҳи сафири ин кишвар тақрибан ду соат давом кард.

Бадр ал-Бусаъидӣ, вазири хориҷии Уммон гуфт, “ин даври музокирот бо бархе пешрафтҳо, аммо бидуни натиҷаи қатъӣ поён ёфт.”

Ӯ ибрози умедворӣ кардааст, ки “рӯзҳои наздик масъалаҳои боқимонда аниқ мешаванд ва ин имконият медиҳад, ки барои дастёбӣ ба тавофуқи пойдор пеш равем.”

Дар ҳамин ҳол хабаргузории Садо са Симо якуним соат пас аз оғози музокирот гузориш дод, ки фиристодаи вижаи ИМА Стивен Уиткофф “бо сабаби парвоз маҳалли музокиротро тарк кард.”

Хабаргузории “Ройтерс” аз қавли як манбаи манбаи наздик ба тими музокиракунандаи эронӣ гузориш дод, ки “интизор меравад гуфтугӯи Эрон ва Амрико идома пайдо кунад. Замон ва макони музокироти баъдиро тарафи Уммон таъйин мекунад.”

Як мақоми аршади амрикоӣ низ гуфтааст, гуфтугӯ бо Эрон “созанда” буд, вале “ҳанӯз корҳое аст, ки бояд анҷом шаванд.”

Даври панҷуми музокироти ИМА ва Эрон дар ҳоле баргузор шуд, ки баҳсҳои ду тараф бар сари барномаи ҳастаии Ҷумҳурии исломӣ боло гирфтааст. ИМА талаб дорад, ки Эрон аз ғанисозии уран даст кашад, то ки барномаи ҳастаиаш роҳро барои эҷоди силоҳи атомӣ боз накунад. Вале мавзӯи ҳифзи ғанисозии ураниум баръакс, аз назари Эрон усулӣ аст.

Дар ҳамин ҳол, қудратҳои аврупоӣ таҳдид карданд, ки дар сурати адами созиш бо ИМА то охири моҳи июл, таҳримҳои соли 2015-и СММ алайҳи Эрон баргардонида мешаванд.

Президент Доналд Трамп хабар дод, ки Вашингтон аз 1-уми июн метавонад барои молу маҳсулот аз кишварҳои Иттиҳоди Аврупо 50 дарсад таърифа ё боҷи гумрукӣ ҷорӣ кунад.

Трамп дар шабакаи иҷтимоиаш TruthSocial навишт, "монеаҳои азими тиҷоратии онҳо, андоз аз арзиши иловашуда, ҷаримаҳои хандаовар барои ширкатҳо, маҳдудиятҳои тиҷоратӣ, даъвоҳои беадолатона ва беасос алайҳи ширкатҳои амрикоӣ,” боиси касри тиҷорат бо ИМА дар ҳаҷми 250 миллион доллар дар сол шудааст.

Раиси ҷумҳури Амрико таъкид кардааст, ки "гуфтушуниди мо бо онҳо ба ягон ҷойе намерасад!"

Ба гузориши маҷаллаи Politico, изҳороти Трамп чанд соат пеш аз гуфтугӯҳои телефонии Комиссари тиҷорати Аврупо Марош Шефчович ва намояндаи тиҷоратии ИМА Ҷеймисон Грир садо дод.

Дар оғози моҳи апрел маъмурияти Доналд Трамп барои молу колои 185 кишвари ҷаҳон таърифа (тариф, тарофа) ё боҷи гумрукӣ ҷорӣ кард. Азҷумла Трамп барои маҳсулоти Иттиҳоди Аврупо 20 дарсад таъин карда буд.

Русия аз оғози ҷанг дар Украина 109 ҳазору 625 сарбоз ва низомиёнашро аз даст додааст. Ин оморро бахши русии Би Би Си, вебсайти "Медиазона" ва гурӯҳе аз ихтиёриён ҷамъоварӣ кардаанд.

Ба қавли ин манбаъ, танҳо давоми ду ҳафтаи ахир 2009 сарбози Русия кушта шудаанд.

Рӯзноманигорони Би Би Си, “Медиазона” ва гурӯҳи ихтиёриён номи сарбозони кушташударо аз манобеи боз ҷамъоварӣ мекунанд. Номи баъзе кушташудаҳо аз ин рӯйхат метавонад берун монад.

На Русия ва Украина омори расмӣ дар бораи талафоти сарбозонашон дар ҷангро нашр намекунанд, вале бар тибқи арзёбиҳои хадамоти ҷосусии кишварҳои ғарбӣ мумкин аст, дар ин ҷанг садҳо ҳазор нафар ҷон бохтаанд.

Дар шаҳри Руми Итолиё қарор аст даври панҷуми музокироти миёни ИМА ва Эрон бар сари барномаи ҳастаии Ҷумҳурии Исломӣ барпо шавад, ки чандин чолишҳое дорад. Садди муҳимтарин дар ин музокирот тавонмандии Эрон барои ғанисозии ураниум аст ва ИМА талаб дорад, ки Эрон аз он даст кашад, то ки барномаи ҳастаиаш роҳро барои эҷоди силоҳи атомӣ боз накунад. Вале мавзӯи ҳифзи ғанисозии ураниум баръакс, аз назари Эрон усулӣ аст.

Вазири корҳои хориҷии ин кишвар Аббос Арақчӣ мегӯяд, ки ин масъала дар ҳолати будан ё набудани созиш бояд бетағйир монад. Арақчӣ пеш аз парвоз ба Рум рӯзи 23 май дар саҳифааш дар Х навишт, ки дастёбӣ ба созиш аз нарм шудани мавқеи ИМА дар робита бо ҳақи ғанисозии ураниум вобастагӣ дорад. Арақчӣ навишт: «Мушаххас кардани роҳи дастёбӣ ба созиш кори мушаксозӣ нест. Фурсати қабули қарор расидааст». Маъмурияти Трамп талаб дорад, ки Эрон пурра аз фаъолиятҳои ғанисозӣ даст кашад.

Дар ҳамин ҳол, қудратҳои аврупоӣ таҳдид карданд, ки дар сурати адами созиш бо ИМА то охири моҳи июл, таҳримҳои соли 2015-и СММ алайҳи Эрон баргардонида мешаванд. Дар таҳдиди ҷудогонааш Исроил гуфтааст, дар сурати набуди созиш, барои ҳамла ба ҳадафҳои ҳастаии Эрон иқдом хоҳад кард. Арақчӣ дар посух гуфт, дар сурати ҳамла ба ин кишвар Эрон аз «тадбирҳои вижа» кор хоҳад гирифт.

Ҳукумати ИМА донишгоҳи Ҳарвардро аз қабули донишҷӯёни хориҷӣ барои таҳсил маҳрум кард. Илова ба ин, маъмурияти президент Доналд Трамп донишомӯзонеро, ки дар ин муассиса таҳсил мекунанд, маҷбур дорад ба дигар мактабҳои олӣ гузаранд, чун дар акси ҳол ҳақи будубоши қонунӣ дар ин кишварро аз даст медиҳанд. Дар ин бора рӯзи 22 май вазорати амнияти дохилии ИМА хабар дод.

Вазир Кристи Ноэм амр дод, ки иҷозатномаи кори барномаи табодули донишҷӯёни Ҳарвард бекор карда шавад ва ин муассисаи таълимиро дар “дастгирии хушунат, яҳудиситезӣ ва ҳамоҳангсозии фаъолияти кориаш бо ҳизби коммунистии Чин” гунаҳгор намуд.

Аз ин пеш маъмурияти донишгоҳ талаби вазорати амнияти дохилиро барои додани маълумот дар бораи бархе донишҷӯёни хориҷиаш рад кард. Дар Ҳарвард қарори маъмурияти Трампро, ки ба ҳазорҳо донишҷӯ дахл дорад, ғайриқонунӣ ва интиқомҷӯӣ ва ҳам амале номиданд, ки рисолати академикию таҳқиқотии Ҳарвардро ба ҳам мезанад. Донишгоҳ ваъда додааст, ки донишҷӯёни осебдидаро дастгирӣ мекунад.

Соли 2024-2025 ба донишгоҳи бонуфузи Ҳарвард 6800 донишҷӯи хориҷӣ қабул шуд ва ин 27% -и шумори умумии донишомӯзони ин муассиса ба шумор мераванд, навиштааст Reuters. Ин донишҷӯён аз 140 кишвари ҷаҳон намояндагӣ мекунанд.

Президенти ҷумҳурихоҳ Доналд Трамп мехоҳад низоми фаъолияти колелҷҳои хусусӣ ва мактабҳо дар саросари ИМА-ро тағйир диҳад ва онҳоро дар паҳн кардани идеологияи зиддиамрикоӣ, марксистӣ ва чапгароӣ муттаҳам намудааст. Трамп Ҳарвардро барои ҷалби демократҳои бонуфуз ба мақомҳои омӯзгорӣ ва раҳбарӣ интиқод намуд.

Моҳи апрел маълум шуд, ки маъмурияти Трамп маблағгузории донишгоҳи Ҳарвардро дар ҳаҷми 2,2 миллиард доллар қатъ ва ин донишгоҳро дар вайрон кардани ҳуқуқи шаҳрвандӣ ва муборизаи нокофӣ бо яҳудиситезӣ гунаҳгор намуд.

Кохи Сафед инчунин маблағгузории донишгоҳи Колумбияро дар ҳаҷми 400 миллион доллар боздошт. Ин қарор вокуниши мақомот ба мавҷи эътирозҳои ҷонибдорони Фаластин дар донишгоҳои Амрико буд, ки амалҳои артиши Исроил дар Ғаззаро маҳкум намуданд.

Русия ва Украина табодули рӯйхати асиронро аз рӯи меъёри “1000 ба 1000”, ки дар борааш дар музокираи ҳафтаи гузашта дар Истамбул ба мувофиқа расида буданд, ба анҷом расониданд. Бар асоси ин феҳрист ҳарду кишвар бояд ҳазорнафарӣ асиронро ба ҳамдигар супоранд.

Президенти Украина Владимир Зеленский дар Телеграм каналаш навишт, ки феҳристи Маскав ба дасти онҳо расидааст. “Созиши озод кардани 1000 нафар мардуми мо аз асорати Русия шояд ягона дастовари мулоқот дар Туркия бошад. Мо корро барои таъмини иҷроиши ин созиш пеш мебарем”.

Дар Кремл ҳам котиби матбуот Дмитрий Песков тасдиқ кард, ки феҳристи асирон ба дасти онҳо расидааст. Агар ин тавофуқ иҷро шавад, ин азимтарин табодул дар миёни ду кишвар аз замони шурӯи ҷанг дар соли 2022 хоҳад буд.

Дар Озарбойҷон як шаҳрванди Тоҷикистон боздошт шудааст, ки ба навиштаи матбуоти Русия, давоми 11 сол мавриди ҷустуҷӯи сохторҳои ҳифзи қонуни ин кишвар будааст. Тағаймурод Эмомовро раҳбари як гурӯҳи қочоқбари маводи мухаддир номида, ӯро дар Русия барои содироти “чандсад килограмм ҳероин” мавриди ҷустуҷӯ қарор дода буданд.

ТАСС аз қавли манбаъҳояш дар сохторҳои ҳифзи қонуни Русия навишт, Эмомовро дар ҳудуди Озарбойҷон боздошт кардаанд ва акнун ӯ дар пешорӯи истирдод ба Русия қарор дорад.

Тафтишот дар Русия ба хабаргузории расмӣ гуфтааст, ки Эмомовро дар ташкили “ҷиноятҳои махсусан вазнин” дар соҳаи муомила бо маводи мухаддир гумонбар медонанд. Дар ҳоле, ки маълум нест худи Эмомов дар ин бора чӣ назар дорад ва оё бо вакили дифоъ таъмин аст ё на, сохторҳои тафтишотӣ дар Русия ба матбуот гуфтаанд, ки Эмомов тавассути курйер ё борбарҳои дигар ба қаламрави Русия садҳо килограмм ҳероин ворид кардааст.

“Бисёри онҳое, ки бо Эмомов кор кардаанд, баъди боздошт алайҳи Эмомов ба ҳайси ташкилкунандаи ин тиҷорати сиёҳ баёнот додаанд ва бархе аз онҳо аллакай баъди анҷоми мӯҳлати ҷазо ба озодӣ баромадаанд”, навишт хабаргузории русӣ аз қавли манбааш дар сохторҳои ҳифзи қонун.

Мақомоти ҳифзи қонун дар Тоҷикистон дар ин бора ҳеҷ хабаре нашр накардаанд ва маълум нест, то куҷо ин маълумоти нашршуда пурра ба ҳақиқат ҷавобгӯ аст ё не.