Дар чанд ҷумла
Дар Остона нахустин ҳамоиши Итолиё ва Осиёи Марказӣ барпо мешавад
Рӯзи 30 май дар пойтахти Қазоқистон – шаҳри Остона қарор аст ҳамоиши раҳбарони кишварҳои Осиёи Марказӣ ва Итолиё баргузор шавад. Ин нахустин ҳамоиш дар чунин чаҳорчӯб хоҳад буд, ки дар он ҳамкориҳои иқтисодию сиёсии миёни кишварҳои минтақа ва Итолиё баррасӣ мешавад. Қарор аст дар ин ҳамоиш президентони Қазоқистон, Тоҷикистон, Қирғизистон, Узбекистон ва Туркманистон – Қосимҷомарт Тоқаев, Эмомалӣ Раҳмон, Содир Ҷабборов, Шавкат Мирзиёев ва Сардор Бердимуҳаммадов бо нахуствазири Итолиё Ҷорҷиа Мелонӣ дидору гуфтугӯ кунанд.
Мелонӣ ба Остона аз шаҳри Самарқанд равона мешавад, ки он ҷо давоми рӯзҳои 28-29 май бо президент Мирзиёев ҳамкориҳо бо Узбекистонро баррасӣ мекунад.
Ба иттилои хабаргузории итолиёии Agenza Nova, вазири корҳои хориҷии Итолиё Антонио Таянӣ дар остонаи ин сафар дар мулоқоте бо сафирони Осиёи Марказӣ дар Рум гуфтааст, ки ҳадаф тақвияти ҳамкориҳо дар масоили мисли энержӣ, иртиботот, зерсохторҳо, мудирияти захираҳо об мебошад.
Дар ин мулоқот, ки ду ҳафта пеш барпо шудааст, Ҷамолиддин Убайдулло, сафири Тоҷикистон дар Рум ба имкониятиҳои фаннии Тоҷикистон таъкид карда гуфтааст, ки дар сурати сармоягузории Итолиё мешавад барои “рушди соҳаҳои мисли гидроэнергетика, металлургия, маъдан, саноати хурокворй ва туризм дар Тоҷикистон ҳамкориҳои муваффақе ба роҳ монд”. Ӯ гуфтааст, ҳамоиши Остона метавонанад барои эҷоди шарикии қавӣ мусоидат кунад.
Ҷузъиёти аз ин беш феълан нашр намешавад, ҳамчунон ки феълан маълум нест, то куҷо хоҳиши пешбурди ҳамкориҳои бештар расидагӣ ба масоили доғи мисли ҳуқуқи башар ва озодии баёнро дар кишварҳои Осиёи Марказӣ пешбинӣ мекунад.
Ҳамаи кишварҳои минтақа бо нишондодҳои бад дар ин бахш маъруфанд ва раҳбарони минтақаро барои саркӯби озодиҳо ва зиндонӣ кардани мухолифону мунаққидони ҳукумат, аз ҷумла дар Тоҷикистон интиқод мекунанд.
Апрели соли 2024 президенти Тоҷикистон Эмомалӣ Раҳмон дар як сафари расмӣ ба Рум бо нахуствазири Итолиё Ҷорҷиа Мелонӣ дидору гуфтугӯ ва ҳафт санади ҳамкорӣ дар масоили амниятӣ, мубориза бо қочоқи маводи мухаддир ва сайёҳиро имзо карданд.
Дар чор моҳ 20 ҳазор муҳоҷирро аз Русия пеш кардаанд
Додгоҳҳои Русия аз аввали сол то кунун бештар аз 20 ҳазор муҳоҷири ғайриқонунӣ, азҷумла ҳазорон шаҳрванди Тоҷикистонро аз ин кишвар хориҷ кардаанд. Дар ин бора хабаргузории Интерфакс бо такя ба дафтари матбуоти Идораи додгоҳҳо хабар додааст.
Бо сахттар шудани меъёру муқаррароти кор барои хориҷиён, бахусус муҳоҷирон дар Русия, ихроҷ ва ё рондани онҳо аз қаламрави ин кишвар идома дорад.
Хабаргузории Интерфакс рӯзи 26-уми май гуфт, ки дар муддати чор моҳи гузашта бо амри додрасҳои Русия андаке бештар аз 19 ҳазор муҳоҷирро аз кишвар берун кардаанд, ки дар муқоиса ба ҳамин давраи соли гузашта 2600 нафар камтар аст.
Дар чор моҳи аввали соли 2024 аз Русия бештар аз 2700 нафарро ихроҷ карда будаанд. Ба гуфтаи дафтари матбуоти идораи додгоҳҳои Русия, сабаби камтар шудани депортатсия ва ё ихроҷ фармони президент Владимир Путин аст, ки муҳлати қонунӣ кардани ҳузуру кори муҳоҷирон дар Русияро то рӯзи 10-уми сентябр дароз кард.
Видеоро инҷо бинед:
Владимир Путин моҳи декабри соли гузашта бо имзои як фармон аз муҳоҷирону хориҷиёне, ки ғайриқонунӣ дар қаламрави Русия зиндагӣ мекунанд, хост, ҳузурашонро қонунӣ кунанд, дар акси ҳол аз хоки Русия ронда мешаванд. Баъди ин амалиёту ҷустуҷуи муҳоҷирони қонуниву ғайриқонунӣ дар саросари Русия зиёд шуд ва олуда ба бадрафтории маъмурони милиса бо муҳоҷирон ҳам буд.
Охири моҳи март бо судури фармони дигаре ба муҳоҷирон 4 моҳи дигар муҳлат доданд, ки санадҳояшонро қонунӣ кунанд ва кор то ба ҷое расид, ки муҳоҷирон дар навбат паси дарҳои идораҳои муҳоҷират дасту по шикастанд ва ҳатто ҷон доданд.
Ба гуфтаи мақомоти Русия соли 2024 аз қаламрави ин кишвар 88 ҳазор хориҷиеро берун кардаанд, ки ғайриқонунӣ кору иқомат доштанд. Ба қавли мақомот, соли 2024 бештар аз 30 ҳазор шаҳрванди Тоҷикистонро аз Русия ихроҷ кардаанд ва бисёр аз онҳо ҳақ надоранд, то 5 сол ба қаламрави ин кишвар баргарданд.
Шикоят аз он ҳам зиёд буд, ки баъзе аз ин афрод тамоми санадҳоро доштанд ва қонунӣ кору иқомат мекарданд, вале маъмурони милиса ҳеч яке аз онҳоро ба инобат намегирифтанд.
Русия мизбони асосии муҳоҷирони кории тоҷик аст ва бино ба гузоришҳо бештар аз як миллион шаҳрванди Тоҷикистон дар он кишвар кору иқомат мекунанд. Гузоришҳо дар бораи бадрафторӣ таҳқиру бадрафторӣ бо ин муҳоҷирон ва зери по кардани ҳуқуқи онҳо зиёд нашр мешавад.
Аврупо маҳдудияти истифодаи силоҳро барои Украина бекор кардааст
Кишварҳои аврупоӣ ба Украина иҷозат додаанд, ки аз силоҳҳои додаи онҳо бо ҳадафи мудофиа ба дохили Русия зарба занад. Дар ин бора Садри аъзами Олмон Фридрих Мертс хабар додааст.
"Дигар ҳеҷ гуна маҳдудият барои истифодаи таслиҳот ба Украина вуҷуд надорад - на аз ҷониби Бритониё, на Фаронса ва на аз ҷониби мо. Аз ҷониби Амрико низ ҳеҷ гуна маҳдудият вуҷуд надорад," - қайд кард Мертс.
Ба гуфтаи Садри аъзами Олмон, Киев метавонад бо ҳадафи дифоъ аз худ, ба иншоотҳои низомии Русия ҳамла кунад.
Фридрих Мертс дар гузашта чанд бор даъват кардааст, ки кӯмакҳои таслиҳотӣ ба Украина зиёд карда шаванд.
Расонаҳо: Трамп таҳримҳои навро алайҳи Русия баррасӣ мекунад
Президент Доналд Трамп ин ҳафта ҷорӣ кардани таҳримҳои нав алайҳи Русияро баррасӣ мекунад. Дар ин бора нашрияи Wall Street Journal бо такя ба манобеаш дар Кохи Сафед гузориш додааст.
Ба гузориши манбаъ, ҳадаф аз таҳримҳои нав маҷбур кардани Владимир Путин ба гузашт ва қабули оташбас дар ҷанг алайҳи Украина аст.
Нашрияи Wall Street Journal мегӯяд, дар бораи таҳримҳои нав ҳанӯз тасмими ниҳоӣ гирифта нашудааст ва Трамп метавонад аз ин кор даст кашад.
Рӯзи 25-уми май Доналд Трамп, раиси ҷумҳури Амрико аз амалкарди ҳамтои русаш Владимир Путин интиқод карда гуфт, ҷорӣ кардани таҳримҳои нав алайҳи Маскавро баррасӣ мекунад. Трамп дар як изҳороти бесобиқа тундлаҳнаш гуфт, раҳбари Русия Владимир Путин "комилан девона шудааст." Изҳороти раиси ҷумҳури Амрико дар пайи он садо дод, ки артиши Русия рӯзҳои ахир ҳамлаи густурдаеро бо паҳпод ва мушак алайҳи Украина оғоз кардааст.
Мавқеи Тоҷикистон дар раддабандии Global Peace як зина беҳтар шуд
Тоҷикистон дар раддабандии кишварҳои амн мавқеъи худро як зина беҳтар кардааст.
Дар гузориши солонаи Global Peace, ки Пажӯҳишгоҳи иқтисод ва сулҳ нашр кард, Тоҷикистон дар байни 163 кишвари ҷаҳон аз нигоҳи амну осоиш дар ҷойи 72-юм қарор гирифтааст.
Дар ин раддабандӣ Тоҷикистонро аз нигоҳи сатҳи ҷинояткорӣ, вуҷуди низоъҳои дохиливу хориҷӣ, суботи сиёсӣ, хароҷоти мудофиа ва дигар нишондодҳо баҳо додаанд. Дар 10 соли охир Тоҷикистон дар ин раддабандӣ мавқеъи худро 37 зина беҳтар кардааст.
Русия ва Украина мутаносибан дар ҷойҳои 156 ва 159-ум ва дар қатори кишварҳои ноамн қарор гирифтаанд. Дар поёни ин рӯйхат Яман қарор дорад, ки аз даргириҳои мусаллаҳона, бӯҳрони башарӣ ва бесуботии сиёсӣ ранҷ мебарад.
Ба панҷгонаи кишварҳои осоиштаи ҷаҳон Исландия, Ирландия, Австрия, Зеландияи Нав ва Сингапур шомил гардидаанд. Ин давлатҳо бо сатҳи баланди амният, сатҳи пасти ҷинояткорӣ, набуди низоъҳои дохиливу байналмилалӣ ва муассисаҳои устувори идоракунӣ фарқ кардаанд.
Бино ба ин гузориш, соли 2024, дар умум сатҳи амният дар тамоми ҷаҳон бадтар шудааст. Муаллифони тадқиқот бад шудани вазъро дар 97 кишвари ҷаҳон таъкид карда, сабабро ба афзоиши ташаннуҷи сиёсӣ, низоъҳои мусаллаҳона ва бӯҳронҳои дохилии сиёсиву иқтисодӣ рабт додаанд.
Дар Арабистони Саудӣ фурӯши бомаҳдудияти машруботро иҷоза хоҳанд дод
Арабистони Саудӣ дар соли 2026 фурӯш ва истеъмоли бомаҳдудияти машруботи алкоҳолиро иҷоза хоҳад дод. Дар ин бора нашрияи ҳиндии The Economic Times хабар дода гуфтааст, ки чунин тасмим дар доираи омодагиҳо ба Намоишгоҳи ҷаҳонии EXPO 2030 ва Қаҳрамонии ҷаҳон оид ба футболи соли 2034 гирифта шудааст.
Ба навиштаи ин расона, фурӯши машрубот танҳо дар минтақаҳои муайян ва на дар бештар аз 600 ҷой иҷоза дода мешавад. Ин асосан меҳмонхонаву осоишгоҳҳо барои ҷаҳонгардон хоҳад буд. Танҳо муассисаҳои соҳиби иҷозатнома ва фурӯшандаҳои омӯзишдида ҳақи фурӯши машруботро хоҳанд дошт.
Дар ин муассисаҳо фурӯши оби ҷаву май иҷоза дода хоҳад шуд. Фурӯши машруботи сангини алкоҳолӣ мисли ҳамеша манъ мебошад. Тағйирот дар сиёсати машруботи кишвар бахше аз барномаи давлатии рушди иқтисод то соли 2030 гуфта мешавад.
Як ҳадафи ин барнома рушди соҳаи туризм аст. Ин чиз боиси афзоиши ҷойҳои корӣ ва ҷалби сармояи хориҷӣ хоҳад шуд. Дар Арабистони Саудӣ аз соли 1952 қарори манъи фурӯш ва истеъмоли машруботи алкоҳолӣ амал мекунад.
"Як шӯхӣ буд". Қасри президенти Фаронса ба шаппотихӯрии Макрон аз дасти ҳамсараш посух дод
Дафтари раёсатҷумҳурии Фаронса рӯзи душанбе талош кард ҳодисаи аз дасти ҳамсараш Бриҷит дар рӯяш як торсакӣ хӯрдани Эммануэл Макронро камаҳамият нишон диҳад. Саҳнаи бо дасташ ба рӯи шавҳараш задани Бриҷит ба ҳангоми дар фурудгоҳи шаҳри Ҳанои Ветнам фуруд омадани ҳавопаймо дар оғози сафари ӯ ба Осиёи Ҷанубӣ дар наворҳои видеоӣ дида шудааст.
Дар ин навор дида мешавад, ки рӯзи якшанбе, пеш аз он ки Макрон аз ҳавопаймои президентӣ фуруд ояд, як шаппотӣ мехӯрад, ӯ маҷбур мешавад як қадам қафо монад ва билофосила ба сӯи дурбинҳои хабарнигорон дасташро бардошта салом мекунад.
Дар ин бора хабаргузориҳои ҷаҳонӣ, аз ҷумла Рейтерс ва Франс Пресс хабар додаанд. Ҳамсари Макрон дар авввал як лаҳза аз дурбинҳо худро қафо кашида баъдан ҳамроҳ бо ҳамсараш аз ҳавопаймо поин меояд.
Дар посух ба саволҳои матбуот Қасри Елисей талош кардааст ин ҳолатро камаҳамият карда вуҷуди даъво миёни ҳамсаронро, ки аз соли 2007 арӯсӣ кардаанд, рад намуд. “Ин лаҳзае буд, ки президент ва ҳамсараш пеш аз шурӯи сафар як лаҳза фароғате доштанду бо ҳам шӯхӣ мекарданд”. “Ин як лаҳзаи ҳамоиши онҳо буд”, гуфтааст қасри президенти Фаронса.
Макрон ба Ветнам бо мақсади тавсеаи ҳамкориҳо бо ин кишвари собиқ истеъмории Фаронса сафар кардааст.
Ҳомии ҳуқуқ шиносномаашро дар дохили номаи почта корношоям пайдо кард
Як ҳомии ҳуқуқи инсон дар Узбекистон гуфт, пеш аз сафараш ба Ирландия шиносномаашро дар ҳолати корношоям дарёфт. Шарифа Мадраҳимова, ки бояд барои гирифтани ҷоизаи созмони байналмилалии Ҳомиён ҳуқуқи инсон (Front Line Defenders) ба Ирландия парвоз мекард, шиносномаи визадорашро ба даст гирифта, вале охирин саҳифаи он сӯзонида шуда буд.
Мадраҳимова гуфт, азбаски дар Узбекистон сафорати Ирландия амал намекунад, ӯ 17 апрел шиносномаашро бо DHL ба он кишвар фиристод. 6 май шиносномааш ба дасти ӯ расид, дар он визаи ирландӣ зада шуда буд, вале ин санад ғайриқобили истифода гардида буд.
Ӯ гуфт: “Рӯзи 7 май хаткашон аз Фарғона ба Хӯқанд шиносномаи маро овард. Номаи DHL беайб буд, тоза ва ҳеҷ мушкиле надошт. Дар дохили он лифофаи дигари хурдтаре буд. Вақте ман онро боз кардам, як бӯи бадеро ҳис кардам. Вақте шиносномаро ба даст гирифтам, дидам, ки қисми пушташ сӯзонида шуда буд. Касе номаро кушода шиносномаро хароб кардааст, то ки ман аз Узбекистон хориҷ нашавам. Аз як сӯ, мешавад гуфт, ки ин ҳам ба маънои эътирофи кори ман аст”, гуфт ин ҳомии ҳуқуқ аз Узбекистон.
Масъулони созмони Front Line Defenders гуфтанд, ки вақте шиносномаро ба Узбекистон мефиристоданд, он ҳеҷ мушкиле надошт. Дар ширкати DHL дар Тошканд ҳам гуфтанд, ки онҳо ҳама санадҳоро бе ягон айбу харобкорӣ ба дасти соҳибонашон мерасонанд. Ҳусан Тангриев, сухангӯи хадамоти гумруки Узбекистон дар посух ба Мадраҳимова гуфт, ки онҳо дохили номаҳои аз хориҷа омадаро тафтиш намекунанд.
Баъди ин Мадраҳимова хост шиносномаи хориҷии нав ба даст оварад, ки бояд дар даҳ рӯз омода шавад, вале то ҳол омода накардаанд. Маросими супурдани ҷоизаҳои ҳомиёни ҳуқуқ рӯзи 22 май дар шаҳри Дублин барпо шуд. Дар ин маросим нутқи Мадраҳимоваро ҳомии дигари маъруфи ҳуқуқ аз Узбекистон Умеда Ниёзова қироат кард.
Шарифа Мадраҳимова бисёр вақт ба хотири кораш мавриди фишор қарор гирифтааст. Солҳои охир фаъолияти ӯ ба назорат аз кори кӯдакон дар майдони пахта тамаркуз ёфтааст.
30 кушта дар Ғазза дар рӯзи якшанбе
Рӯзи якшанбе, 25 май дар натиҷаи ҳамлаҳои Исроил дар Ғазза дастикам 30 нафар кушта шуданд. Дар ин бора Reuters аз қавли вазорати беҳдошти Ғазза хабар дод, ки таҳти назорати Ҳамос мебошад ва ин ташкилотро ИМА ва Иттиҳоди Аврупо террористӣ эълон кардаанд.
Хабар дода шуд, ки дар шаҳри Ҷабалияи воқеъ дар шимоли Ғазза як манзили журналисти маҳаллӣ мавриди ҳамла қарор гирифт ва ҳамроҳ бо худи ӯ чандин узви оилааш ба ҳалокат расиданд. Дар урдугоҳи паноҳандагони Насирот як мақомдори соҳаи наҷотбахшӣ ҳамроҳ бо ҳамсараш дар ҳоле кушта шуданд, ки дар дохили манзили худ қарор доштанд.
Хадамоти матбуоти ҳукумати Ғазза гуфт, ки аз октябри соли 2023 дар ин минтақа 220 хабарнигори фаластинӣ кушта шудаанд. Артиши Исроил хабар дод, ки фармондеҳи ситоди кулл Эял Замир зимни мулоқот бо низомиён дар Хон Юнис гуфтааст, “ин ҷанг беохир нест”.
Ӯ гуфтааст, дороиҳои бисёри Ҳамос, аз ҷумла фармондеҳиаш нобуд карда шуд.
Муштзанҳои тоҷик дар қаҳрамонии Осиё 16 медал гирифтанд
Варзишгарони тоҷик дар мусобиқоти қаҳрамонии бокси Осиё миёни ҷавонон, ки рӯзҳои 12-23-юми май дар шаҳри Коломбои Шри-Ланка баргузор шуд, 16 медал (3 тилло, 5 нуқра ва 8 биринҷӣ) ба даст оварданд.
Ба иттилои дафтари матбуоти Конфедератсияи бокси Осиё (ASBC), дар мусобиқоти қаҳрамонии қора миёни ҷавонон 232 муштзан аз 23 кишвар ширкат дошт.
Мусобиқот дар Коломбо мувофиқи синну соли варзишгарон дар ду гурӯҳ сурат гирифт: миёни муштзанҳои то 18-сола ва байни ҷавонони то 22-сола.
Ба ҳайати мунтахаби Тоҷикистон дар мусобиқоти қаҳрамонии Осиё байни муштзанҳои то 18-сола 9 нафар ва миёни ҷавонони то 22-сола 10 нафар шомил буданд.
Муштзанҳои тоҷик дар миёни то 18-солаҳо 7 медал (2 тилло, 2 нуқра ва 3 биринҷӣ) ба даст оварданд.
Алишерхудо Холов (71 кг) ва Абубакр Ғафуров (75 кг) бо медалҳои тилло, Муҳаммадсултон Султонов (67 кг) ва Билолҷон Иксанов (54 кг) бо медалҳои нуқра, Фариноз Абдуллоева (54 кг), Мино Аъзамзод (60 кг) ва Муҳаррамхон Тошхӯҷаева (70 кг) бо медалҳи биринҷӣ мукофтонида шуданд.
Абубакр Ғафуров беҳтарин муштзани Осиё миёни навҷавонони то 18-сола эътироф гардид.
Муштзанҳои тоҷик дар миёни ҷавонони то 22-сола 9 медал (1 тилло, 3 нуқра ва 5 биринҷӣ) гирифтанд.
Анӯшервон Фозилов (54 кг) бо медали тилло сарфароз гашт. Меҳроҷ Суфиҷонов (51 кг), Дамир Муйбалихонов (60 кг) ва Ҳангома Исоева (60 кг) барандагони нишонҳои нуқра шуданд.
Муинхӯҷа Муъминов (48 кг), Руслан Ғафуров (63,5 кг), Муродҷон Ашуралиев (71 кг), Фариза Ёқубова (52 кг) ва Дилноза Нуримова (63 кг) бо медалҳои биринҷӣ сарфароз гаштанд.
Дар мусобиқоти қаҳрамонии бокси Осиё дар Шри-Ланка муштзанҳои ҷавони Қазоқистон аз ҳама бештар – 41 медали тилло – ба даст оварданд, хабар додааст sports.kz
Дастаи мунтахаби мардонаи Қазоқистон дар байни ҷавонони то 22-сола 10 медали тилло, дастаи занонаи ин кишвар 9 медали тилло гирифтанд.
Дар байни муштзанҳои то 18-сола бошад, қазоқҳо байни писарон соҳиби 10 медали тилло шуданд. Духтарони муштзани қазоқ ҳамаи 12 нишои тиллоро азони худ карданд.
Президенти Амрико гуфт, шояд рӯзҳои наздик аз музокира бо Эрон "хабарҳои хубе" ба даст ояд
Президенти ИМА Доналд Трамп гуфт, ки дар музокироти ҳастаӣ бо Эрон пешрафте ҳосил шудааст ва ишора кард, ки шояд дар “ду рӯзи дигар” як “хабари хубе” садо бидиҳад. Вале ӯ ҷузъиёте надод. Трамп дар сӯҳбат бо хабарнигорон рӯзи 25 май дар робита бо гуфтугӯҳои рӯзи ҷумъаи миёни Амрикову Эрон дар Рум гуфт, “мо бо Эрон гуфтугӯи бисёр-бисёр хубе доштем”. Ӯ афзуд: “Намедонам, то куҷо дар давоми ду рӯзи дигар ман ба шумо хабари хуб ё баде расонида тавонам, вале эҳсоси ман ин аст, ки як чизи хубе хоҳам гуфт”.
Трамп афзуд, ки дар гуфтугӯҳои гузашта “мо пешрафти воқеӣ, пешрафти ҷиддие ба даст овардем”. “Биёед, бубинем, ки чӣ мешавад, вале ба фикрам мо метавонем дар ҷабҳаи Эрон ба хабарҳои хубе даст ёбем”, гуфт президенти ИМА.
Баъди даври панҷуми музокирае бо миёнҷигии Уммон дар Рум, матбуот дар бораи ишораҳои мухталифе хабар доданд. Пеш аз сафар ба Рум ҳам мақомот дар Вашингтон ва ҳам дар Теҳрон дар масъалаи ғанисозии ураниум мавқеи қотее нишон доданд, вале Аббос Арақчӣ, вазири корҳои хориҷии Эрон гуфт, ки баъди чандин пешниҳоди Уммон имконияти пешрафте ҳосил шудааст. Арақчӣ гуфт, “мо тоза як давраи бисёр касбии музокиротро анҷом додем... Мо ба мавқеи Эрон қотеона истодагарӣ кардем... Умедворем, дар як-ду ҷаласаи оянда битавонем ба роҳкорҳое бирасем, ки музокироти қобили пешрафт бошад”.
Эрон ва Амрико дар марҳилаи кунунӣ масъалаи дастёбии Эрон ба ғанисозии ураниумро баррасӣ доранд, ки дар сурати дасткашии Теҳрон аз он, Вашингтон ваъдаи бекор кардани таҳримҳоро медиҳад. Вашингтон аз табдили он ба силоҳи атомӣ нигарон аст. Эрон ҳифзи ин барномаро як масъалаи усулӣ медонад.
Баъди пирӯзии Паноҳӣ дар Канн мақомоти Эрон кордори Фаронсаро фаро хонданд
Мақомот дар Теҳрон барои изҳори назари, ба қавли онҳо “таҳқиромези” вазири корҳои хориҷии Фаронса дар робита бо пирӯзии филми коргардони эронӣ дар ҷашнвораи синамои Канн сафири он кишварро фаро хонданд. Дар саҳифаи Х Жан-Ноэл Барро, вазири корҳои хориҷии Фаронса рӯзи 24 май, баъди барандаи “Нахли тиллоӣ” эълон шудани филми Ҷаъфари Паноҳӣ ғалабаи ӯро “иқдоми муқовимат алайҳи режими саркӯбгари эронӣ” номид.
Дар маросими рӯзи шанбе Паноҳии 64-соларо барои филмаш “Як тасодуфи содда” бо шоҳҷоизаи озмуни байналмилалии синамо қадрдонӣ карданд. Дар ин филм панҷ қаҳрамони он зидди марде мубориза мебаранд, ки ба боварашон онҳоро дар дохили зиндон шиканҷа кардааст. Дар ин филм чандин ҳунарпешаи зан бидуни ҳиҷоби маҷбурӣ зоҳир шудаанд.
Хабаргузории IRNA рӯзи якшанбе навишт, ки “дар паи шарҳҳои таҳқиромез ва иттиҳомҳои беасоси вазири Фаронса..., кордори ин кишвар дар Теҳрон ба вазорат даъват шуд”. Дар он гуфта шудааст, ки Эрон “сӯиистифодаи ҳукумати Фаронса аз ҷашнвораи Канн” ба хотири “пешбурди ҳадафҳои сиёсиаш алайҳи Ҷумҳурии Исломиро маҳкум мекунад”. Дар ин бора хабаргузории Франс Пресс хабар додааст.
Дар ҳоле, ки дар ҷашнвораи Канн филми Паноҳӣ, ки аз таҷрибаи дар зиндони Эрон буданаш маншаъ мегирад, мавриди таваҷҷӯҳи зиёди мунаққидон қарор гирифт, дар дохили Эрон расонаҳои давлатӣ хабари пирӯзии филмро нодида гирифтаанд. Бархе расонаҳо, мисли оҷонсии Форс, аъзои ҳакамони ҷашнвораи Каннро “сиёсизада” номиданд. Нашрияҳои “Эътимод”, “Шарқ” ва “Ҳаммеҳан”-и ислоҳталабон хабари пирӯзии Паноҳиро на дар саҳифаи аввал, балки дар дохили нашрияшон чоп карданд.
Худи Паноҳӣ, ки аз соли 2010 баъди борҳо зиндонӣ шуданаш дигар ҳақи филмбардорӣ дар Эронро надорад, дар муроҷиаташ ба ширкатдорони ҷашнвораи Канн мардуми кишварашро ба ваҳдат даъват кард.
Рӯзи 26-уми май Паноҳӣ ва тими ҳунармандонаш баъди бозгашт ба Эрон дар фурудгоҳи Теҳрон бо истиқболи гарми ҳаводорон рӯбарӯ шуданд, ки шиори "Зан, зиндагӣ, озодӣ"-ро ба забон меоварданд.
Ин бори дуюм аст, ки як филмсози эронӣ барандаи “Нахли тиллоӣ”-и ҷашнвораи Канн мешавад. Соли 1997 Аббоси Киёрустамӣ барои “Таъми гелос” ҷоизаи Каннро бурда буд. Киёрустамӣ ҳам дар давоми фаъолияти эҷодиаш бо монеа барои кору фаъолият рӯбарӯ шудааст.
Шаш муҳоҷири фавтидаи тоҷикро дар Қубодиён дафн карданд
Шаш муҳоҷири тоҷикро, ки дар роҳ ба Русия ҷон бохта буданд, дар зодгоҳашон ноҳияи Қубодиён ба хок супориданд. Як манбаъ дар ҳукумати Қубодиён ба Радиои Озодӣ гуфт, маросими видоъ бо муҳоҷирон 25-уми май баргузор шуд.
Ба гуфтаи манбаъ, турбати шаш муҳоҷирро дар оромгоҳи деҳаи Зиракӣ дафн карданд.
Рӯзи 20-уми май як мошини муҳоҷирони тоҷик дар ҳудуди Қазоқистон ба садама дучор шуд. Дар ин ҳодиса шаш кас ба ҳалокат расида, панҷ тани дигар маҷруҳ шуданд. Аҳволи ду нафар аз захмиён вазнин гуфта мешавад.
Дар ин садама Аҳтам Каримови 36-сола, Назрулло Боқиеви 24-сола, Бахтигул Боқиеваи 40-сола, Юсуф Солиҳови 67-сола, Фаёзиддини Солиҳзодаи 35-сола ва Маҳмадюнус Аминзодаи 33-сола ҳалок шуданд.
Ҳазорон шаҳрвандони Тоҷикистон бо сабаби гарон будани нархи билети ҳавопаймо, тариқи роҳҳои заминӣ ба Русия мераванд.
Путин қонуни навро дар бораи назорати муҳоҷирон имзо кард
Владимир Путин, раиси ҷумҳури Русия 23-юми май қонуни назорати муҳоҷиронро тавассути телефон имзо кард. Ин қонун муҳоҷиронро дар шаҳр ва вилояти Маскав муваззаф мекунад, ки тариқи барномаи махсуси телефонӣ, дар куҷо будани худро ба сохторҳои Вазорати корҳои дохилӣ хабар диҳанд.
Бар асоси ин санад, сар аз 1-уми сентябри имсол дар шаҳри Маскав ва вилояти ҳамноми он, таҷрибаи нав дар бораи макони ҷойгиршавии муҳоҷирон ҷорӣ мешавад. Агар мақомоти Русия дар муддати се рӯз ё бештар аз он дар бораи дар куҷо будани муҳоҷир маълумот нагиранд, пас ин шаҳрванди хориҷӣ ба рӯйхати шахсони зери назорат ворид карда мешавад. Ворид шудани номи шахс ба ин рӯйхат будубоши ӯро дар Русия манъ мекунад.
Ба ҷуз муҳоҷирон, тартиби нав барои ҳама шаҳрвандони хориҷие амалӣ карда мешавад, ки ба муддати зиёда аз 90 рӯз вориди Маскав ва вилояти ҳамноми он мешаванд. Ин тартиб дар навбати аввал ба муддати чор сол ва танҳо дар вилоят ва шаҳри Маскав амалӣ мешавад.
Дар назар аст, ки сар аз соли 2029 ин муқаррарот дар тамоми Русия ҷорӣ шавад.Баъди соли 2024 Русия барои муҳоҷирон қонунҳои сахтгирона ҷорӣ кард.
